Blog

അങ്ങിനെ 4 ദശാബ്ദങ്ങൾക്കപ്പുറം, സ്ഥിരതാമസത്തിനു നാട്ടിൽ,  തൃശ്ശൂരിൽ, തിരിച്ചെത്തിയിട്ട്,  ഇന്ന് രണ്ടാം ദിവസം!

ഒരു തിരിഞ്ഞു നോട്ടം:

എന്റെ അപ്പാപ്പനു ഓട്ടുപാറയിലും, അപ്പനു വടക്കാഞ്ചേരിയിലും  ഇംഗ്ലീഷ് മരുന്ന് ഷോപ്പുകൾ ആയിരുന്നതുകൊണ്ട് അവരെന്നെ ഡോക്ടർ ആക്കാൻ ഉഴിഞ്ഞു വെച്ചിരിക്ക്യായിരുന്നു!  വടക്കാഞ്ചേരിയിൽ ഞങ്ങൾക്ക് വേറെ വീട് വാങ്ങിച്ചപ്പോൾ തന്നെ,  അവിടെ  ഉണ്ടായിരുന്ന ഔട്ട്ഹൗസ് അഭിനവ ഡോക്ടരുടെ കൺസൾട്ടിങ് റൂം ആക്കി ഉറപ്പിച്ചിരുന്നവരാണവര്! എനിക്കും അന്ന് അതിനു താല്പര്യമുണ്ടായിരുന്നൂട്ടാ! 

ബി.എസ്. സി സൂവോളജി ഇരിഞ്ഞാലക്കുട ക്രൈസ്റ്റിൽ! കോളേജ് പഠനം കഴിഞ്ഞപ്പോൾ എം.ബി.ബി.സ് എൻട്രൻസ് എഴുതി, കിട്ടാത്ത കാരണം വടക്കാഞ്ചേരിയിൽ നിന്ന് ബോംബെക്കു, 1982 ൽ ട്രെയിൻ കേറി യാത്ര,  “കമ്പ്യൂട്ടർ” പഠിക്കാൻ!, എൻ.ഐ.ഐ.റ്റി യിലേക്ക്.  അന്നവർക്കു ആകെ രണ്ടു ബ്രാഞ്ചുകൾ മാത്രം, മറ്റൊരെണ്ണം ദില്ലിയിലും! ഇന്നാണെങ്കിൽ മിക്ക വില്ലേജിൽ പോലും അവർക്കു ടീച്ചിങ് സെന്ററുകൾ ഉണ്ടല്ലോ!

ആകെ കണ്ടിട്ടുള്ളത് ശാസ്ത്ര മാഗസിനിൽ വന്ന കംപ്യൂട്ടറിനെ പറ്റിയുള്ള ലേഖനം മാത്രം. ഫസ്റ്റ് കസിൻ അമേരിക്കയിൽ കൊല്ലങ്ങൾക്കു മുൻപേ പോയി കമ്പ്യൂട്ടർ സയൻസിൽ ഡോക്ടറേറ്റ് നേടി, സിറ്റി ബാങ്കിൽ വൈസ് പ്രസിഡന്റ് ആയി ഐ റ്റി യിൽ ജോലിയാണെന്നറിയാം. മൂപ്പരുടെ ഏറ്റവും ഇളയ അനിയൻ ബോംബയിൽ എൻ.ഐ.ഐ.റ്റി യിൽ കമ്പ്യൂട്ടർ ലാംഗ്വേജ് കോഴ്സ് ചെയ്യുന്നുണ്ട്. അതായിരുന്നു ആശ്വാസം. ഞങ്ങൾ ചെറുപ്പം മുതലേ വളരെ ക്ളോസായിരുന്നു. അപ്പൊ പിന്നെ ബോംബെ ഒന്ന് കറങ്ങിയിട്ടു വരാമെന്നേയ് ചിന്തിച്ചിരുന്നുള്ളു. അതിനു മുൻപേ സ്‌കൂളിൽ നിന്ന് ബാംഗ്ലൂർക്കു എസ്കർഷന് പോയതല്ലാതെ, (അതും അനിയത്തിക്ക് കൂട്ടായിട്ടുമാത്രം), അതല്ലാതെ സ്റ്റേറ്റ് വിട്ടു ഒരിടത്തും വീട്ടുകാരുടെ കൂടെയല്ലാതെ പോയിട്ടില്ല, അപ്പൊ അതിന്റെ ഒരു ത്രില്ല്.

അവിടെ ചെന്ന് ചെമ്പൂരിൽ, ഫെയർ ഹോസ്റ്റ് ലോഡ്‌ജിൽ മാസവാടകക്കു താമസം. മറൈൻ ഡ്രൈവിൽ രഹിജ ചേമ്പറിൽ കമ്പ്യൂട്ടർ ക്ലാസ്സ്. അന്ന് ഹാർബർ ലൈനിൽ മാൻഖുർഡ് സ്റ്റേഷൻ വരയെ ട്രെയിൻ ഉള്ളു. ചെമ്പൂർ കഴിഞ്ഞു രണ്ടു സ്റ്റോപ്പ് മാത്രം! (പിന്നീട് ഒരിക്കൽ അവിടെ ചെന്നപ്പോൾ കണ്ണ് തള്ളിപ്പോയി, കടൽ കടന്നു ബ്രിഡ്ജിൽ എക്സ്റ്റൻഷൻ, എയർപോർട്ട് പോലെയുള്ള വാശി ട്രെയിൻ സ്റ്റേഷൻ!)

അങ്ങിനെ ജീവനുള്ളതിൽ നിന്നും ജീവനില്ലാത്തതിലേക്കു നുഴഞ്ഞു കയറി എന്റെ ക്യാര്യർ തുടക്കം!

അപ്പാപ്പൻ മാസാമാസം കാശ് അയക്കും. വാടകയും, ഭക്ഷണവും പിന്നെ യാത്രയും കഴിഞ്ഞു അല്പം സേവിങ്സ്, അത് സിനിമ കാണാൻ!
എന്തായാലും ഉഴപ്പാൻ തോന്നിയില്ല. ഒന്നാമത് തികച്ചും അപരിചിതമായ സബ്ജെക്ട്, പിന്നീട്, എനിക്ക് നല്ലോണം ഇന്ററസ്റ്റ് തോന്നി. ക്‌ളാസിൽ ഒക്കെ കാശുകാര് പിള്ളേര് മാത്രം, അവിടെ ഷൈൻ ചെയ്യാൻ, പഠിപ്പു മാത്രമേ വഴിയുള്ളു. പോരാത്തേന് കസിൻ ബ്രദർ, ക്ലാസ്സിൽ ഫസ്റ്റ് റാങ്ക് വാങ്ങിയാണ് തിരിച്ചു പോയത്. മൂപ്പര്ക്കതു സാധിക്കും, ജീനിയസ് ആയിരുന്നു. (അതൊക്കെ വേറെ ഒരു ഫീച്ചർ ആയി വരും). ഞാൻ കുത്തിയിരുന്ന് പഠിച്ചു. മോശമാക്കിയില്ല, എനിക്കും കിട്ടി ഫസ്റ്റ് റാങ്ക്! അതോടെ അവിടെ തന്നെ ഓൺ ദി ജോബ് കിട്ടി. കുട്ടികൾക്ക് പ്രാക്ടിക്കൽസ് ചെയ്യിപ്പിക്കലാണ് പണി. അവര് ഷെഡ്യൂൾ ചെയ്യാത്ത സ്ലോട്ട് ഒക്കെ ഞാൻ കമ്പ്യൂട്ടർ യൂസ് ചെയ്യാൻ എടുത്തു, അതായിരുന്നു അട്ട്രാക്ഷൻ.

അങ്ങിനെയിരിക്കുമ്പോൾ ഓഫീസ് മുഖാന്തിരം തന്നെ, ഭോപ്പാലിൽ കുറച്ചു പേർക്ക് ജോബ് ഓപ്പർച്യുണിറ്റി ഉണ്ടെന്നു അറിഞ്ഞു, കൂടെ ഉള്ള ട്രെയിനീസ് എന്നെയും കൂടെ പോരാൻ നിർബന്ധിച്ചു, എനിക്ക് ഭോപ്പാൽ കണ്ടു വരണമെന്നല്ലാതെ വേറെ ഒരു താല്പര്യവും ഇല്ലാരുന്നു, ഭോപ്പാലിൽ സ്വന്തക്കാരാരുമില്ല. പക്ഷെ വിധി മറ്റൊന്നായിരുന്നു. ഇന്റർവ്യൂ കഴിഞ്ഞു അവർ എന്നെ മാത്രം സെലക്ട് ചെയ്തു. നിവൃത്തിയില്ലാതെ ആദ്യ ജോബ് എക്സ്പീരിയൻസ് നേടാൻ മാത്രം ഞാനവിടെ തങ്ങി! ഒരു കൊല്ലം കഴിഞ്ഞു ബോംബേക്കു തിരിച്ചു പോയി, വേറെ നല്ല ജോലിയിൽ കേറാം എന്നായിരുന്നു വിചാരം.

അങ്ങിനെ ആദ്യജോലി ഭോപ്പാലിൽ,  ഒരു ഫെയ്മസ് കമ്പ്യൂട്ടർ കൺസൾട്ടൻസിയിൽ ജൂനിയർ പ്രോഗ്രാമർ ആയി ആണ് തുടക്കം, മിക്ക വർക്കും എസ്.ബി.ഐ ക്കു വേണ്ടിയുള്ളതായിരുന്നു, കൂടെ ലൈൻ പ്രിന്ററിൽ മാസ്സ് പ്രിന്റിങ്! അവിടെ ഇരുപതോളം ഡാറ്റ എൻട്രി ഓപ്പറേറ്റർസ്, മുഴുവനും മലയാളികൾ! ഞങ്ങൾ 4 പേർ പ്രോഗ്രാമിങ് ചെയ്യാനും, ഡാറ്റ സെന്റർ ഓപ്പറേഷൻ മാനേജ് ചെയ്യാനും,

ആദ്യ ജോലിക്കിടയിൽ ഗ്യാസ്ട്രാജഡി നേരിട്ടു!  (ആ അനുഭവങ്ങൾ വേറെ എഴുതിയിട്ടുണ്ട്)  അതിനു ശേഷം നാട്ടിൽ വന്നു തിരിച്ചു പോയതിൽ പിന്നെ, ഒരു കൊല്ലത്തിനുള്ളിൽ തന്നെ, അവിടത്തെ ഞങ്ങളുടെ ഐ.റ്റി. ഹെഡ്,  സ്വന്തം സർവീസ് സെന്റർ വേറെ ആരംഭിച്ചപ്പോൾ, എന്നെയും കൂടെ കൂട്ടി! ഒ.ഏം.എസ്. കൺസൾറ്റൻറ്സ്! ഗുപ്താജി ഒരു പ്രോഗ്രാമിങ് ജീനിയസ് ആയിരുന്നു, എം ടെക് കമ്പ്യൂട്ടർ സയൻസ്, ബിറ്റ്‌സ് പിലാനി  പ്രോഡക്റ്റ്! ഗുരുവിന്റെ ശിക്ഷണത്തിൽ ഒരു മൂന്നു കൊല്ലം. ഞാൻ  സ്റ്റ്ക്ച്ചർഡ് പ്രോഗ്രാമിങ്ങിൽ മാസ്റ്റർ ആയത് അവിടെ വെച്ചാണ്. പല വലിയ പ്രൊജെക്ടുകളും ചെയ്തു,  പ്രീ എഞ്ചിനീയറിംഗ് ആൻഡ് മെഡിക്കൽ എൻട്രൻസ് ടെസ്റ്റ് പ്രോസസ്സിംഗ്, കൂടാതെ കോഴ്സും കോളേജും അലോക്കേഷൻ! എല്ലാം ശരിക്കും ഹെവി ഡ്യൂട്ടി തന്നെയായിരുന്നു! അന്ന് ബാച്‌ലർ ആയതുകൊണ്ട് മാത്രമല്ല എന്റെ ഇന്ററസ്റ് കൊണ്ടും മിക്കവാറും സമയം ഓഫീസിലും പിന്നെ പല സൈറ്റ്കളിലും ഞാൻ തന്നെ പോയി വർക്ക് ചെയ്തു കൊടുത്തിരുന്നു. പിന്നീട് ഉജ്ജയിനിയിൽ എം. പി. സംസഥാന സർക്കാരിന്റെ കോ ഓപ്പറേറ്റീവ് സൊസൈറ്റിയുടെ ഒരു സോയാബീൻ ഫാക്ടറിയിൽ ഇ.ഡി. പി സെന്റർ ഇൻചാർജ്, ഡെപ്യൂട്ടി മാനേജർ (സിസ്റ്റംസ്) തസ്തികയിൽ, മൂന്ന് വർഷത്തിന് ശേഷം ഓൾ ഇന്ത്യ  എക്സാഉം ഇന്റർവ്യൂയും കഴിഞ്ഞു മുംബൈയിൽ ഐ.ഡി.ബി.ഐ. ബാങ്കിന്റെ ഹെഡ് ഓഫീസിൽ (ഐ. ഡി.ബി.ഐ. ടവർ, കഫേ പരേഡ്) മാനേജർ (ഐ.റ്റി,) പോസ്റ്റിങ്ങ് 1991 ൽ!

അന്ന് പബ്ലിക് സെക്ടറിലെ ഐ.ഡി.ബി.ഐ. ബാങ്ക്, ഇൻഡസ്ട്രിയൽ ഫൈനാൻസിങ് മാത്രമായിരുന്നു. കൊമേർഷ്യൽ ബാങ്കിങ് പിന്നെ മെർജ് ചെയ്തു ഉണ്ടായതാണ്! എസ്.ഐ.ഡി.ബി.ഐ തുടങ്ങുന്നേ ഉണ്ടായിരുന്നുള്ളു ! എന്റെ പോസ്റ്റിങ്ങ് ആദ്യം എസ്.ഐ.ഡി.ബി.ഐയിൽ ആയിരുന്നെങ്കിലും പിന്നീട് സ്വാധീനം ചെലുത്തി വേറെ ആൾക്കാർ എനിക്ക് പകരം അവിടെ പോയി. അതായിരുന്നെങ്കിൽ തുടക്കം ആയതുകൊണ്ട് പ്രോസ്പെക്ടസ് കൂടുതലായിരുന്നു! എന്തായാലും, എനിക്ക് അവിടെ നല്ലവണ്ണം ശോഭിക്കാൻ കഴിഞ്ഞു.ബാങ്കിന്റെ നേഷൻ വൈഡ് പേ റോൾ സോഫ്റ്റ്‌വെയർ (ഇൻഫോർമിക്സ് 4ജിഎൽ) ഞാൻ തനിച്ചാണ് ഡെവലപ്പ് ചെയ്തതെന്ന് പറഞ്ഞാൽ വിശ്വസിച്ചേ മതിയാകു. ആ പാക്കജ് ഈ അടുത്തകാലം വരെ യൂസ് ചെയ്തിരുന്നു എന്നത് എനിക്ക് അഭിമാനം തന്നെ. മറാഠി ഗ്രൂപ്പ് അതിശക്തം, ബോസ് ഉൾപ്പടെ അവർക്കായിരുന്നു ഫേവർ. 

ജോയിൻ ചെയ്തപ്പോൾ എന്റെ കല്യാണം ജസ്റ്റ് കഴിഞ്ഞതേ ഉണ്ടായിരുന്നുള്ളു! പിന്നീട് വൈ.റ്റു.കെ. ഭൂമിൽ, എല്ലാരും പറഞ്ഞു പറഞ്ഞു 1998ൽ മനസ്സില്ലാമനസ്സോടെ അമേരിക്കയിലേക്ക്, ഒരു പക്ഷെ, അന്ന് എനിക്ക് കൊച്ചിക്കു ട്രാൻസ്ഫർ അനുവദിച്ചു കിട്ടിയിരുന്നെങ്കിൽ ഞാൻ ഇപ്പോൾ അവിടെ നിന്ന് റിട്ടയർ ആയേനെ. അമേരിക്കയിൽ നാലര വർഷം, പല കമ്പനികളിൽ, ആദ്യം ചെന്നത് ന്യൂയോർക്കിൽ ഒരു കൺസൾട്ടൻസിയിൽ, ഇൻഫോർമിക്സ് ഡാറ്റാബേസ് കമ്പനിയിൽ കസ്റ്റമർ സർവീസ് റെപ്രെസെന്ററ്റീവ്, ദൂര യാത്രകൾ ആയിരുന്നു, സൈറ്റ് കളിൽ നിന്നും വേറെ സൈറ്റ് കളിലേക്കു! മിക്കതും 5 സ്റ്റാർ ഹോട്ടലുകളിൽ ആയിരുന്നു താമസമെങ്കിലും കൾച്ചറൽ ഡിഫറെൻസ് കാരണം വല്ലാതെ വിഷമിച്ചു. (ആ അനുഭവങ്ങൾ പിന്നീട് എഴുതാം) ഇന്നായിരുന്നെങ്കിൽ അത് ഏറ്റവും എന്ജോയ് ചെയ്തേനെ.പിന്നീട് എ,റ്റി.ആൻഡ്.റ്റി, ബെൽ അറ്റ്ലാന്റിക്(ബാൾട്ടിമോർ), വാൾമാർട് ഹോം ഓഫീസ് അർകാൻസ,  എം.സി.ഐ. വേൾഡ് കോം കൊളറാഡോ സ്പ്രിങ്സ്, വീട്ടുകാരും വന്നു. അവിടെ 3 വർഷം കഴിഞ്ഞു,

2001 ൽ പെട്ടെന്ന് എന്റെ ഡാഡി മരണപ്പെട്ടു, നാട്ടിൽ എന്റെ അമ്മ തനിച്ചായതുകൊണ്ടു നേരത്തെ നിശ്ചയിച്ചുറപ്പിച്ചിരുന്ന സമയത്തേക്കാൾ മുന്പ് മാതൃ രാജ്യത്തേക്ക് തിരിച്ചു വരവ്! എന്തായാലും നാട്ടിലേക്ക് തിരിച്ചു വരണമെന്ന് നിശ്ചയിച്ചുറപ്പിച്ചിരുന്നു. സുഖസൗകര്യങ്ങൾ ഏറെ ഉണ്ടെങ്കിലും നമ്മുടെ സംസ്‍കാരം അതുപോലെ അവിടെയില്ല! പ്രത്യേകിച്ച്  എനിക്ക് രണ്ടു പെൺകുട്ടികളും! അവരെ നാട്ടിൽ തന്നെ പഠിപ്പിക്കണമെന്ന്  മുൻപേ തീരുമാനിച്ചിരുന്നു!  ഒരു പക്ഷെ ഞാൻ പഴയ തലമുറയിലെയായതു കൊണ്ടാവാം, അവിടത്തെ കുറെ കാര്യങ്ങൾ എനിക്ക് ദഹിക്കുന്നവയായിരുന്നില്ല! പ്രത്യേകിച്ചും റിലേഷന്ഷിപ്സ്!

2002 ൽ അവിടെ കാര്യങ്ങൾ സെറ്റിൽ ചെയ്ത്, കുടുംബം അടക്കം തിരിച്ചു വന്നു! ദൈവകാരുണ്യം കൊണ്ട്  തന്നെ എനിക്ക് തിരൊന്ദ്രത്തു ടെക്നോപാർക്കിൽ ജോലിക്കു കേറാൻ പറ്റി. 2024 ൽ രാജി വെക്കുന്ന വരെ, ഒരേ കമ്പനിയിൽ (യൂ .എസ്. ടി. പണ്ടത്തെ യൂ.എസ്. സോഫ്റ്റ്‌വെയർ) സെർവ് ചെയ്തു, ഒരു കോർപ്പറേറ്റ് ലെ സകലതും കണ്ടു,  ചിലതു കണ്ടില്ലെന്നും നടിച്ചില്ല! അതിന്റെ ഫലം അനുഭവിച്ചു!🙁 എങ്കിലും നോ റിഗ്രെറ്റ്സ്!👍 അതിനിടക്ക് പല തവണ അമേരിക്കയിൽ ജോലി സംബന്ധമായി പോയിയും വന്നും ഇരുന്നു!ഓഫീസ് വഴി ലോകത്തിലെ വലിയ പല കമ്പനികൾക്കു വേണ്ടിയും വർക്ക് ചെയ്തു.  2024 ൽ 22 കൊല്ലത്തിനു ശേഷം കമ്പനിയിൽനിന്നും രാജി വെച്ച് മക്കളുടെ അടുത്തേക്ക്, അമേരിക്കയിൽ, കുറച്ചു മാസം പോയി നിന്ന് തിരിച്ചു വന്നു, പിന്നീട് ഒന്നും കൂടി പോയി, മകളുടെ കോൺവെക്കേഷൻ അറ്റൻഡ് ചെയ്യാനുംകൂടി. നാലര മാസം നിന്നു.

ഇതിനിടക്ക്‌ ഒരു എ.ഐ. കോഴ്‌സിന് ചേർന്നു. പുതിയ പിള്ളേർ എങ്ങിനെ ഇനി ഐ.റ്റി. യിൽ വർക്ക് ചെയ്യും എന്നറിയാൻ ആകാംക്ഷയായിരുന്നു! പിന്നീടത് ഒരു ഹരമായി മാറി!. ഇനി ഇപ്പൊ, എന്തും ഏതും ചെയ്യാം എന്ന കോൺഫിഡൻസ്, ഏത് വിഷയമായാലും!!പണ്ട് കഷ്ടപ്പെട്ട് സമയമെടുത്ത് സ്വന്തം ബുദ്ധി  മാത്രം മുഴുവൻ ഉപയോഗിച്ച് ചെയ്തതെല്ലാം ഇപ്പൊ എ.ഐ. നിമിഷങ്ങൾ കൊണ്ട് ചെയ്തു തരും. എക്സ്പീരിയൻസ് വെച്ച് എ.ഐ. ചെയ്തു തരുന്നത് റിവ്യൂ ചെയ്താൽ മാത്രം മതി. റിവ്യൂ ഈസ് എ മസ്റ്റ്, അറ്റ് ലീസ്റ് ഫോർ നൗ!  ഞാൻ 40ൽ പരം കൊല്ലമായി ഐ.റ്റി. യിൽ. ഇപ്പോഴത്തെയും ഇനിയത്തെയും ജനറേഷന് അത്രകാലം  ഇനി ഐ.റ്റി.യിൽ നില്ക്കാൻ പറ്റുമോ എന്നറിയില്ല!  നമ്മൾ വിചാരിക്കാത്ത പോയിന്റ്കളൊക്കെ അത് പരിഗണിക്കും, സൂചിപ്പിക്കും! അമേസിങ് ഇൻഡീഡ് ! പണ്ട് ഇൻഡസ്ട്രിയൽ റെവല്യൂഷൻ വന്ന പോലെ തന്നെ, ഇത് അതുക്കും മേലെ! അസാധ്യം!

ഇനി പുതിയ അധ്യായത്തിലേക്കു കടക്കാം.

ത്യശ്ശൂർ വന്നു താമസിക്കുക എന്നത് പിന്നീടെടുത്ത തീരുമാനമായിരുന്നു. വടക്കാഞ്ചേരിയിൽ വന്നു പഴയ സ്ഥലത്തു പുതിയ വീട് പണിതു സ്ഥിരതാമസമാക്കാനായിരുന്നു 2024 വരെ ഉള്ള ആഗ്രഹം. വീട്ടുകാർക്കാണെങ്കിൽ തൃശ്ശൂര് വരണം എന്നായി, ബന്ധുക്കളെല്ലാം അവിടെ ആണെന്നും പറഞ്ഞുകൊണ്ട്. എന്തായാലും വളർന്ന വീട് വിറ്റ് ഒരു പറമ്പു വാങ്ങിയിട്ടുണ്ട് തൃശ്ശൂര്, അവിടെ വീട് പണി നടക്കണമെങ്കിൽ കടമ്പകൾ പലതുണ്ട്. നോക്കാം.

പണ്ട് തന്നെ ഒരു ഫ്ലാറ്റ് തൃശൂർ നഗരമധ്യത്തിൽ വാങ്ങിയിട്ടിരുന്നത് ഉപകാരമായി. ഫ്ലാറ്റ് ചെറുതാണെങ്കിലും അതിന്റെ ലൊക്കേഷൻ  സൂപ്പറാ! റൗണ്ടിൽ തന്നെ, പാറമേക്കാവ് അമ്പലത്തിന്റെ പിൻഭാഗത്ത് , സെന്റ് മേരീസ് കോളേജിന്റെ തൊട്ടടുത്ത്,  നവാനി ഹൈറ്റ്സ് എന്ന കൊച്ചു ബിൽഡിംഗ്. തിരോന്ദ്രത്തെ ഫ്ളാറ്റിനേക്കാൾ ചെറുതും പ്രൗഢി കുറഞ്ഞതാണെങ്കിലും ടൗണിൽ തന്നെയുള്ള എന്റെ ഈ ഫ്ലാറ്റും ഇപ്പോൾ എനിക്കും പ്രിയപ്പെട്ടതായി വരുന്നു, അതിന്റെ മൂലകാരണം തൃശ്ശൂര് മോഡൽ ബോയ്‌സ് സ്‌കൂൾ കാലത്തെ പഴയ ഓർമ്മകളും കൂടെ ആവണം. മ്മടെ നാട്ടിലെ കടകളും കച്ചോടക്കാരും അവരുടെ നല്ല പെരുമാറ്റവും വേറെ ഒരു സ്ഥലത്തും ഇല്ല്യാട്ടാ! ബിസിനസ് എങ്ങിനെ നടത്തണമെന്നും അതിൽ കസ്റ്റമർ ഫേസിങ് റോൾ എത്ര പ്രാധാന്യമുള്ളതാണെന്നും അറിയുന്ന വ്യാപാരികൾ ഇവിടം കഴിഞ്ഞേ വേറെ എവിടെയും ഉള്ളു.

തിരൊന്ദ്രത്തിന് കൊണ്ടുവന്ന സാധനങ്ങൾ ഇറക്കി വെച്ച് ലോറിക്കാര് പോയി. പെട്ടികൾ തുറന്നും  സാധനങ്ങൾ എടുത്തു അടുക്കിയും തളർന്നു, പിന്നെ ഉറങ്ങി. കാലത്തു പുത്തൻ പള്ളിയിലേക്ക് കുർബാനക്ക് നടന്നു പോയി, അത്രയ്ക്ക് ദൂരമല്ലേ ഉള്ളു.

പള്ളിയിൽ നിന്നും തിരിച്ചു വരുമ്പോൾ വഴിയിൽ ഇടത്തും വലത്തുമുള്ള കടകൾ ആണ് ശ്രദ്ധിച്ചത്. തൃശ്ശൂർക്കാരുടെ പ്രിയപ്പെട്ട വെള്ളേപ്പങ്ങാടിയിലൂടെ നടക്കുമ്പോൾ ഒരു ഗൃഹാതുരത്ത്വം ഫീൽ ചെയ്തു. അച്ചപ്പം, കുഴലപ്പം എന്നിവയും ഉണ്ട്. എത്രയോ കൊല്ലം മുൻപ് തുടങ്ങിയ സംരംഭങ്ങൾ! ഇപ്പോഴും അതേ  വൈബ്!  ഒരപ്പത്തിന് 7 രൂപ ആയിട്ടുപോലും, എന്നും കാലത്തു വന്നു വാങ്ങിക്കൊണ്ടുപോകാൻ കൂടുതൽ ആളുകളുണ്ട്.

അടുത്തുള്ള സ്നാക്ക് ജോയിന്റ്കൾ പലതും പുതിയത്. വൈകുന്നേരങ്ങളിൽ പൊരിച്ച മുട്ട വിത്ത്  ഓർ വിതൗട്ട്  ഗ്രീൻ പീസ്, പുഴുങ്ങിയ മുട്ട,  അഷ്ടവർഗ്ഗ കാന്താരി മുട്ട…! കടികൾ പലതരം,  കായ് ബജി, മുളക് ബജി, പഴം പൊരി, സമോസ, കട്ട്ലെറ്റ്, മീറ്റ് റോൾ  എന്നീ സ്ഥിരം സാധനങ്ങൾക്ക് പുറമെ, കോമ്പിനേഷൻ കറികളും;  മീൻ മുളകിട്ടതും കൊള്ളിയും(കപ്പ), ബീഫും കൊള്ളിയും (ബീഫ് ബിരിയാണി), പിന്നെ കോഴി ലിവർ,  ആട്ടിൻ തലച്ചോറ്.. പിന്നെയും കുറെയേറെ കണ്ടു.  റൗണ്ടിലെ കപ്പലണ്ടി വണ്ടികൾ അടി പൊളിയാണ്, കാലത്തു ഹോട്ടൽ  ന്യൂ ഗോപിയിലെ പലതരം ദോശകൾ (നെയ്‌  റോസ്‌റ്റ് ഏറെ പ്രമാദം), സൂപ്പർ  ഉഴുന്ന് വട, വെളുത്തുള്ളി ചട്നി പിന്നെ തേങ്ങാ കട്ടി ചട്നി. എന്റമ്മോ.. ഇതിനൊന്നും ഇത്ര ടേസ്റ്റ് വേറെ എവിടെയും തോന്നിയിട്ടില്ല!😋

അവിടത്തെ പൂരി ബാജി യിലെ പൂരി വലുതും ബാജി ക്വാണ്ടിറ്റി നല്ലോണവും ഉണ്ട്. വേറെ എവിടെ പോയി പൂരി കഴിച്ചാലും ഞാൻ ബാജി എക്സ്ട്രാ കൊണ്ടുവരാൻ പറയും, ഇവിടെ അത് വേണ്ടിവന്നില്ല! ഈ വകയെല്ലാം എന്റെ താമസസ്ഥലത്തിന്റെ ഇട്ടാവട്ടത്തുള്ളത് മാത്രം ആണ് കേട്ടോ!.😲

ഫ്ലാറ്റിനു തൊട്ട മതിൽ സെന്റ് മേരീസ്! സെന്റ് തോമസ് കോളേജ് ഇപ്പോൾ മിക്സഡ് ആണല്ലോ! കാലത്തു ഹോട്ടലിൽ പോയി പ്രാതൽ കഴിച്ചു വരുമ്പോൾ റോഡ് നിറയെ യൂത്ത്, പല വെറൈറ്റി, കളർഫുൾ വേഷങ്ങളിൽ, അങ്ങിനെ പാറിപ്പറന്ന് കോളേജുകളിലേക്ക്! എന്റെ കോളേജ് ലൈഫ് തിരികെ വന്നപോലെ, ഒരു പ്രതീതി, മരീചിക ആണെങ്കിലും. ആ ക്ടാങ്ങളുടെ മുഖത്തു നോക്കി നടക്കുമ്പോൾ വീടെത്തുന്നത് അറിയില്ല! എന്തായാലും എന്റെ വയറു കുറച്ചു കുറക്കണം!😂

തൃശ്ശൂരിന്റെ സ്വന്തം സി.എസ്ബി. ബാങ്കിന്റെ ഹെഡ് ഓഫീസും മെയിൻ ബ്രാഞ്ചും വളരെ അടുത്ത്തന്നെ.

വന്നിട്ട് രണ്ടു ദിവസമായെങ്കിലും ഇന്നാണ് വീട്ടിൽ കുക്കിങ് തുടങ്ങാൻ പ്ലാൻ. ഞങ്ങൾ രണ്ടും ഒരു ഓട്ടോ പിടിച്ചു നേരെ ശക്തൻ മാർക്കറ്റിലേക്ക്, ഓട്ടോ മിനിമം ചാർജ് മാത്രം.

മീൻ മാർക്കറ്റും ഇറച്ചി മാർക്കറ്റും കണ്ടു കൺ കുളിർത്തു. ഉണക്കമീൻ മാർക്കറ്റ്  സൈഡിലും.  പിടയുന്ന ബ്രാല് കണ്ടു, മീൻ, ഒരു കിലോ വാങ്ങി. കുറെ നാളായി ബ്രാല് കൂട്ടിയിട്ട്.

കോഴിയും വാങ്ങി. എല്ലാ കടയിലും എന്തെങ്കിലും ഒക്കെ ഒരു കുശലം പറഞ്ഞു ഇറങ്ങി. നല്ല ഒരു ഫീൽ.

അതുപോലെ അതിന്റെ നേരെ എതിർവശത്തുള്ള  പച്ചക്കറി മാർക്കറ്റും  എല്ലാം ഫ്രഷ്, കോളിഫ്ളവർ കണ്ടു കൊതിയായി. പിന്നെ കൂർക്ക നന്നാക്കിയതും വാങ്ങി. എല്ലാത്തിനും തിരോന്ദ്രത്തേക്കാൾ കുറച്ചെങ്കിലും വില കുറവും ഉണ്ടെന്നു തോന്നി. കച്ചവടക്കാരുമായി ഒരു അടുപ്പവും തോന്നും. ഒരു പക്ഷെ,  മ്മടെ തൃശൂർ ഭാഷ ആയതോണ്ടാവുംട്ടാ!

പണ്ട് എക്സ്പ്ലോർ ചെയ്ത എല്ലാ സ്ഥലങ്ങളും ഇനി പോകാനിരിക്കുന്നതേ ഉള്ളു. ഇനി നല്ലോണം സമയമുണ്ടല്ലോ. പക്ഷെ., ഹോട്ടൽ ത്രിവേണിയും അമ്പാടിയും മിസ്സ് ചെയ്യും. സാരമില്ല, വേറെ കുറെ (അധികം) വന്നിട്ടുണ്ടല്ലോ! 😃

ഇനിയും വിശേഷങ്ങളുമായി പിന്നീട്. ഇപ്പോഴത്തേക്കു ഇത്ര മതീലെ? 🙏

കഴിഞ്ഞ മൂന്നു ദിവസമായി ഞങ്ങൾ തൃശ്ശൂര് ഉണ്ട്, ഒരു ആവശ്യത്തിന് വന്നതാ! പതിവുപോലെ ഇന്നും ഞാൻ ഉച്ചതിരിഞ്ഞു അഞ്ചേകാലിനു ഭാര്യയുടെ വീടിന്റെ അടുത്തുള്ള പാടത്തേക്കു നടക്കാനിറങ്ങി! നിറഞ്ഞുകിടക്കുന്ന കുളവും, അതിലെ പായലിന്റെ ഭംഗിയും നോക്കി കുറച്ചു നേരം കുളത്തിന്റെ അരികിലെ കല്ലിന്മേൽ ഇരുന്നു.

അപ്പോൾ, ഒരു അപ്പാപ്പൻ തന്റെ കൊച്ചു മോളെയും കൂട്ടി എന്റെ പിന്നിലൂടെ നടന്നു പോകുന്നുണ്ടായിരുന്നു. എങ്കിലും ഞാൻ അത്ര ശ്രദ്ധിച്ചില്ലാരുന്നു!

പക്ഷെ അപ്പാപ്പൻ തിരിഞ്ഞു എന്നോട് ചോദിച്ചു, ഈ വീട്ടിലെ മരുമകനല്ലേ?

അതെ എന്ന് ഞാൻ പറഞ്ഞു.

മൂത്ത ആളാണോ? എവിടെയാ?

തിരുവനന്തപുരം!

ഓ! ടെക്നോപാർക്കിൽ ആണല്ലേ?

അതെ എന്നും ഞാൻ, ബേസിക്കലി ഒരു വടക്കാഞ്ചേരിക്കാരനാണ് എന്നും മറുപടി കൊടുത്തു!

എന്നെ ഇവിടുത്തെ മമ്മിക്കു പറഞ്ഞാൽ അറിയും! ഈ കാണുന്ന പാടം എല്ലാം എന്റെ ആണ്.

ഓ, അത് ശരി! എനിക്കാ മനുഷ്യനോട് ബഹുമാനം തോന്നി!

ഞാൻ പറഞ്ഞു, വളരെ വൃത്തിയായി കൃഷി ചെയ്തിട്ടിരിക്കുന്നു. ഇവിടെ വരുമ്പോഴെല്ലാം ഞാൻ ഈ മനോഹാരിത ആസ്വദിക്കാറുണ്ട്, ഫോട്ടോയും എടുക്കാറുണ്ട്.

അതെയോ?! ഞാൻ ഈ പാടങ്ങളൊന്നും വേറെ ആൾക്കാർക്ക് കൃഷി ചെയ്യാൻ കൊടുക്കാറില്ല!

എന്റെ അപ്പാപ്പനും അടാട്ട് കോൾപാടത്തു നെൽകൃഷി ഉണ്ടായിരുന്നു! അഭിമാനത്തോടെ ഞാൻ പറഞ്ഞു. അതൊരു കാലം!

അപ്പോഴയാൾ പറഞ്ഞു, ഈ പാടങ്ങളെല്ലാം ഒരിക്കൽ നിങ്ങളുടെ ആയിരുന്നു!

മുത്തപ്പാപ്പന്മാരായി, ഞങ്ങൾക്ക് ഇവിടെ കൃഷി ചെയ്യാൻ പണ്ട് ഈ പാടമെല്ലാം തന്നതായിരുന്നു, പാട്ടത്തിന്!

ഇ ഏം എസ് മന്ത്രിസഭയുടെ ഭരണകാലത്തു ഭൂപരിഷ്‌ക്കരണനിയമം വന്നപ്പോൾ, ഇതൊക്കെ ഞങ്ങളുടേതായി!

ഓ! ഞങ്ങൾ കൊയ്യും വയലെല്ലാം ഞങ്ങളുടേതാകും! പിന്നെ അതിനു ശേഷം, വിമോചന സമരകാലം!

അതെ അതെ! അയാൾ പറഞ്ഞു.

ഈ വയലിനപ്പുറത്തും സ്ഥലം നിങ്ങളുടേതായിരുന്നു, എന്ന് വെച്ചാ, അവിടത്തെ അമ്മാമേടെ പേരിൽ ആയിരുന്നു!

കമ്മ്യൂണിസ്റ്റ് ഭരണം അയാളുടെ പൂർവികർക്കു തുണയായി! അയാൾക്കും, പിന്നെ അയാളുടെ കുടുംബത്തിനും!

അപ്പോൾ ഞാൻ അമ്മാമയെ ഓർത്തു, അപ്പാപ്പനേയും! പക്ഷെ അമ്മാമയെക്കാൾ കൂടുതൽ ആലോചിച്ചത് അമ്മാമേടെ അപ്പനെ പറ്റി ആയിരുന്നു! ആ കാർന്നോരാണല്ലോ അമ്മാമക്ക് ഈ സ്വത്തുക്കൾ എല്ലാം എഴുതികൊടുത്തത്!

🙏

അയാൾ കൊച്ചുമകളെയും കൂട്ടി തിരിഞ്ഞു നടക്കാനൊരുങ്ങി!
കാറ് കഴുകുമ്പോൾ ഒന്ന് വീണു! ഡോക്ടർ നടക്കാൻ പറഞ്ഞിരിക്ക്യാ!
അപ്പോഴാണ് ഞാൻ അയാളുടെ ഇടത്കാലിലെ ഒരു ടൈപ്പ് സോക്സ്‌ ശ്രദ്ധിച്ചതും, മൂപ്പര് നടക്കുമ്പോൾ ഉള്ള ചെറിയ ഞൊണ്ടലും കണ്ടത്!

ഞാൻ അയാളുടെ പിന്നാലെ കുറച്ചു ദൂരം പോയി.
മൂപ്പര്, പാടം കഴിഞ്ഞ ഉടൻ വലതു വശത്തുള്ള വലിയ ഒരു വീട്ടിലേക്കു കയറി പോയി, പടിക്കു പുറത്തു തന്നെ മൂപ്പരുടെ ഭാര്യ നിൽക്കുന്നുണ്ടായിരുന്നു, കൊച്ചുമോളോട്, റോഡിന്റെ സൈഡിലേക്ക് മാറി നടക്കാൻ പറഞ്ഞുകൊണ്ട്!
ഞാനും റോഡിന്റെ ചാരത്തുകൂടി തിരിഞ്ഞു നടന്നു! 

ശുഭം. 🙏🏻

ഒരു പാർട്ടിയിലും ഇല്ലെങ്കിലും ഞാനെന്നും ഒരു ഇടതു അനുഭാവിയായിരുന്നു, ഇന്നും ആണ്! സഹയാത്രികൻ എന്ന് പറയാൻ വയ്യ! 

അതുകൊണ്ടു മാത്രമായിരുന്നോ ഈ ഒരു അടുപ്പം എന്ന് ചോദിച്ചാൽ… അല്ല എന്ന് പറയേണ്ടി വരും!

ഏത്  വിളിക്കും, യെസ്, വി ആർ വിത് യു എന്ന് കണ്ണും പൂട്ടി പറയാൻ, ഈ ഒരു നേതാവിനോടല്ലേ സാധിക്കു?!

അതാണ് വി.യെസ് (V. S. urf We Yes!) ഞങ്ങൾ കൂടെയുണ്ട്!

ഇത്രക്ക് നിശ്ചയദാര്‍ഡ്യമുള്ള, അഴിമതി ഒട്ടും തീണ്ടാത്ത, ആർക്കുമുന്നിലും തല കുനിക്കാത്ത, നീതിക്ക് വേണ്ടി മാത്രം നിലകൊണ്ട, പാവങ്ങളുടെ കൂട്ടായ വേറെ ഒരു നേതാവ് ഇപ്പോൾ ജീവിച്ചിരിപ്പുണ്ടോ? ഇല്ല!😒

അതുകൂടാതെ  മൂപ്പരുടെ ചില കാര്യങ്ങളൊക്കെ, എൻ്റെ അപ്പാപ്പനെ ഓർമ്മിപ്പിക്കുംവിധമാണ്! തേച്ചുമിനുക്കിയ ആ വെള്ള ജുബ്ബ, കറുത്ത കണ്ണട, ആത്മവിശ്വാസം കൊണ്ടുള്ള, ആ ഗാഭീര്യം നിറഞ്ഞ മുഖഭാവം, ചില പെരുമാറ്റരീതികൾ എല്ലാം വളരെ അധികം സാമ്യമുള്ളതാണ്!

പോരാത്തേന്, എൻ്റെ അടുത്ത ഒരു സുഹൃത്തിൻ്റെ വളരെ അടുപ്പമുള്ള ആളും!

മൂപ്പര് മുഖ്യനായിരുന്നപ്പോൾ, ആ സുഹൃത്തിനെ തൻ്റെ ഐ. റ്റി. അഡ്വൈസർ (ഉപദേഷ്ടാവ്) ആക്കിയിരുന്നു. ആ സുഹൃത്ത് ആ മേഖലയിൽ വളരെ കഴിവുള്ളവനും ആ സ്ഥാനത്തിനു തികച്ചും അർഹനുമായിരുന്നു എന്ന് തന്നെയല്ല അയാൾക്ക്  ഐ. റ്റി.യിൽ പല സംഭാവനകൾ നൽകാനും കഴിഞ്ഞു എന്നുള്ളത് വാസ്തവം!

എന്തായാലും, വേലിക്കകത്ത് ശങ്കരൻ അച്യുതാനന്ദൻ എന്ന വി എസ് നെ കുറിച്ച് പ്രത്യേകിച്ച് ഒന്നും തന്നെ പറയേണ്ടതില്ല! എല്ലാം എല്ലാവർക്കും അറിവുള്ളതാണല്ലൊ! സ്വാതന്ത്ര്യ സമര പോരാളി, ഔപചാരിക വിദ്യാഭ്യാസമില്ലാത്ത, സത്യസന്ധതയും, ആത്മാർത്ഥതയും, പരിചയ സമ്പത്തുകൊണ്ടും, പോരാഞ്ഞു, പ്രസ്ഥാനത്തിന്റെ ആദ്യ നാളുകളിൽ അധികാരികളിൽ നിന്നും കൊടിയ പീഡനങ്ങൾ ഏറ്റുവാങ്ങിയും, പടി പടിയായി ഉയർന്നു വന്നൊരു നേതാവ്!

ഇനി നമ്മുടെ കൂടെ വി എസ്  ഇല്ല!  ഒരു നോക്ക് നേരിട്ട് കാണാൻ തോന്നി, ഇനി കാണാൻ സാധിക്കില്ലല്ലോ!

ഞാനെടുത്ത പടങ്ങളിലൂടെ, അതാണ് നിങ്ങളെയും ഇവിടെ കാണിക്കാൻ ശ്രമിക്കുന്നത്.

വിഎസിന് എൻ്റെ വക എളിയ ഒരു ആദരാഞ്ജലി! 🙏

കാലത്തു ഒൻപതു മണിക്ക് തന്നെ വളരെ നീണ്ട ക്യു!

കുറെ നേരം നിന്നു ! “ആദ്യം നേതാക്കന്മാരുടെ ഊഴമായതു കൊണ്ടാണ് ഇത്ര താമസം” എന്ന് ഒരു പോലീസ്‌കാരൻ പറഞ്ഞു! എത്ര പോലീസ്‌കാരാ! 😯എന്തിനാണിത്രയും?! അത് പോട്ടെ..

പിന്നെ കുറച്ചുംകൂടി കഴിഞ്ഞപ്പോൾ ആളുകൾ മെല്ലെ മെല്ലെ നീങ്ങാൻ തുടങ്ങി! ഹാവൂ!

അതാ വീയെസ്സിനെ കൊണ്ട് പോകാനുള്ള അലങ്കരിച്ച ബസ്!

സെക്രെട്ടറിയറ്റിലെ ഡർബാർ ഹാളിലാണ് വിഎസ്സിനെ കിടത്തിയിരിക്കുന്നത്.എന്നാണ് അറിഞ്ഞത്. അവിടേക്കു എത്താറായി!

പ്രസ്സും, മന്ത്രിമാരും, പ്രമുഖരും, പാർട്ടി പ്രധാന അണികളും! എല്ലാരും ക്യവിനു പുറത്ത്‌ ! കൂടെ ക്യുവിൽ എൻ്റെ ഒപ്പം, സാധാരണക്കാരും സ്ത്രീകളും (ചിലർ കുഞ്ഞുങ്ങളെയും കൊണ്ടാണ് വന്നിരിക്കുന്നത്) പാവപ്പെട്ടവരും ഒക്കെ ഉണ്ട്.🚶🧍‍♂️🚶‍♂️🚶‍♀️

അങ്ങിനെ ഹാളിൽ പ്രവേശിക്കാറായി.🚶‍♀️

അവസാനം കേറി പറ്റി.

💪

അല്പം അകലെ നിന്നാണെങ്കിലും കണ്ടു, ആ മുഖം! കുറച്ചു ദിവസം വെന്റിലേറ്ററിൽ ആയിരുന്നിട്ടു പോലും ആ മുഖത്തിനു അതേ ഗൗരവം, അതേ ഗാഭീര്യം! 🧐

തീയിൽ കുരുത്തതല്ലേ? പിന്നെ എങ്ങിനെ വാടാനാ?! 👌

പിന്നെ, വേഗം തന്നെ, ഹാളിനു പുറത്തേക്ക്!

ഇനി കുറച്ചു വഴിയോര കാഴ്ചകൾ

അറ്റമില്ലാത്ത ക്യു തുടരുന്നു!

ജനസമ്മിതി ഏറെയുള്ള, രണ്ടു വിഭിന്ന രാഷ്ട്രീയ പാർട്ടികളിലെ നേതാക്കന്മാർ, നമുക്കെന്നും, ഓർക്കാൻ! 🙏🙏

വിപ്ലവസൂര്യന് വിട! 😭

വി എസ്, ജനഹൃദയങ്ങളിൽ നിന്ന് ഒരിക്കലും മരിക്കുകയില്ല!

ആരും മറക്കുകയുമില്ല! അത് തീർച്ച! ✊❤️👍

പ്രണാമം 🙏

പിന്നീട്….

ഇരുപത്തിരണ്ടു മണിക്കൂറിലേറെ നീണ്ട വിലാപയാത്രക്ക് ശേഷം, അടുത്ത ദിവസം രാത്രി ഒന്പതുമണി, കഴിഞ്ഞ്;

വലിയ ചുടുകാട്, പുന്നപ്ര, ആലപ്പുഴ.

നൂറ്റിരണ്ടു വര്ഷങ്ങള്ക്കു ശേഷം, ഇനി അന്തിമ വിശ്രമം!

വാൽക്കഷ്ണം:

തൃശ്ശൂര് വരുമ്പോൾ സേക്രഡ് ഹാർട്ട് ലാറ്റിൻ ചർച്ചിൽ ഇടക്കൊക്കെ പോകാറുണ്ട്, കുർബാന മുഴുവൻ കണ്ടില്ലെങ്കിലും അവിടെ പോകുന്നത് ഒരു ആശ്വാസമാണ്. എന്റെ പള്ളീലിട്ട പേര് ആൻ്റണി (അന്തോണി, എന്റെ അപ്പാപ്പന്റെ പേര്, കഴിഞ്ഞ മെയ് 31 നു എന്റെ ഗ്രാൻറ്സണ്ണിനും ആ പേരിട്ടു ! മൂന്നു തലമുറകൾ!) ആയതുകൊണ്ടാണെന്നറിയില്ല, വി. അന്തോണീസിൻറെ ആ പള്ളി എനിക്ക് പ്രിയപ്പെട്ടതാണ്.

യാദൃച്ഛികമായി ആണെങ്കിലും, ഇന്ന് അവിടത്തെ ഊട്ടുതിരുനാളിനു പങ്കെടുക്കാൻ കഴിഞ്ഞു.

ഇക്കണ്ട ജനങ്ങൾ മണിക്കൂറുകൾ ക്ഷമയോടെ ക്യുവിൽ നിൽക്കുന്നത് ഭക്ഷണം കഴിക്കാൻ മാത്രമല്ല എന്ന് വ്യക്തം. പുണ്യാളനിലുള്ള ആഴത്തിലുള്ള വിശ്വാസം! കഷ്ടപ്പാടുകൾ വരുമ്പോൾ മിക്കവരും ദൈവത്തെ വിളിക്കും എന്നതിൽ സംശയമില്ല. ഭക്തി, തന്നെ വന്നു പോകും. വേറെ മാർഗ്ഗം ഒന്നും ഇല്ലെങ്കിലും ഉണ്ടെങ്കിലും സർവേശ്വരൻ ഒരു ആശ്വാസം ആണ്! 🙏 തീർച്ചയായും, അതൊരു പേർസണൽ ചോയ്സ് തന്നെ.

ക്യുവിൽ ഞാനും നിന്നു . പൊരിവെയിലത്തു മെല്ലെ മെല്ലെ മുന്നോട്ടു നീങ്ങി! വല്ലാത്ത ഒരു പ്രത്യേക അനുഭൂതി! പറഞ്ഞറിയിക്കാൻ പറ്റുമോ എന്നറിയില്ല! കുറച്ചു പടങ്ങളിലൂടെ അതിനു ശ്രമിക്കാം. 🖼

സ്ത്രീകളാണ് കൂടുതൽ! അവരക്കു മൂന്ന് വരി, ആണുങ്ങൾക്ക് ഒരു വരി. കൂടുതൽ അരക്ഷിതാവസ്ഥ ഫീൽ ചെയ്യുന്നത് സ്ത്രീകളായിരിക്കും. 🤷‍♂️

തിരഞ്ഞു വളഞ്ഞു പോകുന്ന, അറ്റം കാണാത്ത വരികൾ!

അവസാനം ഡെസ്റ്റിനേഷൻ ദൂരെനിന്നു കണ്ടു.

വിളമ്പുകാർ അടുത്ത് അടുത്ത് വരുന്നു!

അവസാനം എനിക്കും കിട്ടി പുണ്യാളന്റെ ചോറ്!

സാമ്പാറ്, എരിശ്ശേരി, ഇഞ്ചൻപുളി, മാങ്ങാ അച്ചാർ പിന്നെ പപ്പടം ഒന്ന്! (ഞാനൊരു പപ്പടക്കൊതിയനാണ്, പ്രത്യേകിച്ചും സദ്യക്ക്) 😋

അധികം വേവാത്ത ചൂട് ചോറ് ! അതന്നെ നാട്ടിലെ കാര്യങ്ങൾ ഓർക്കാൻ, നൊസ്റ്റാൾജിക് ആവാൻ മതി!

കോരല്ലൂർ, ഓട്ടുപാറ യിൽ ആദ്യത്തെ വീട് മുതൽ പിന്നെ വടക്കാഞ്ചേരി വീട്ടിലേക്കു
മാറിയപ്പോഴും വീട്ടിൽ കൊല്ലത്തിലൊരിക്കൽ ഊട്ടു നടത്തുന്നത് അമ്മച്ചിയുടെ ഒരു പതിവാണ്, നേർച്ചയാണെന്നു തോന്നുന്നു. അന്ന്, ഒരു പാവപ്പെട്ട കുടുംബത്തിന് വീട്ടിൽ വിളിച്ചു പച്ചക്കറി സദ്യ കൊടുക്കും. അപ്പൻ അമ്മ പിന്നെ ഒരു ചെറിയ കുട്ടി! തിരുക്കുടുംബത്തിന്റെ ഓർമ്മയ്ക്ക്! പച്ചക്കറി സദ്യ അന്നും ഇന്നും എന്റെ ഒരു ബലഹീനതയാണ്.

ചോറ് ഇട്ടത് കുറച്ചു അധികം ആയിരുന്നെങ്കിലും പുണ്യാളന്റെ ചോറ് കളയാൻ പാടില്ലല്ലോ! പിന്നെ നല്ല ടേസ്റ്റും ഉണ്ടായിരുന്നു! പ്രത്യേകിച്ച് എനിക്ക് ! കമ്പ്ലീറ്റ് കഴിച്ചു അവസാനിപ്പിച്ചു! 😁

പിന്നെ തിരക്കിനിടയിലൂടെ പാത്രം കഴുകാനും കൂടി പോയി.

അതിനു ശേഷം പുറത്തേക്കുള്ള വഴി നോക്കി കൂട്ടത്തിനിടയിലൂടെ നടന്നു! 🚶

അതിനിടക്ക് ഒരു സെൽഫി! 🤳

പള്ളിയുടെ മുൻവശത്തു എത്തി! അവിടെയും പന്തൽ ഇട്ട കാരണം സ്ഥലം കറക്റ്റ് പിടികിട്ടുന്നില്ല, ⛪

നേർച്ചയിടുന്ന സ്ഥലം അലങ്കരിച്ചിട്ടുണ്ട്.🌹

അമ്മച്ചിക്കും കൂടി നേർച്ച പായസം വാങ്ങാൻ ആ കൗണ്ടറിലേക്ക്അ. അതിനും വേറെ വരി!

അതും കിട്ടി! ശബരിമല അരവണ സ്റ്റൈലിൽ പായ്ക്ക് ! ഒരു പക്ഷെ സെയിം വെണ്ടർ തന്നെ ആയിരിക്കും! ദൈവം ഒന്നല്ലേയുള്ളു പല വേഷങ്ങളിൽ വരുമെന്ന് മാത്രം!

പിന്നെ ഓട്ടോ വിളിച്ചു, കാർ പാർക്ക് ചെയ്ത സ്ഥലത്തേക്ക്🚗

അങ്ങിനെ, ഊട്ടു കഴിഞ്ഞു, വീട്ടിലെത്തി! ശുഭം 🙏

അത് ഒരു ഒന്ന് ഒന്നര സിനിമാ തീയേറ്റർ തന്നെ ആണ്, അന്നും ഇന്നും!

70 എംഎം സ്ക്രീൻ,  സ്റ്റീരിയോഫോണിക് സെവൻ ട്രാക്ക് സൗണ്ട് ആയിരുന്നു തുടങ്ങിയ കാലത്ത്! ‘ദി റോബോട്സ്’ എന്ന സംഗീതത്തിനൊപ്പം പതുക്കെ ഉയരുന്ന ചുവന്ന  കർട്ടൻ ! 1974 ഓഗസ്റ്റിൽ തൃശ്ശൂരിൽ റിലീസ് ചെയ്ത അത്ഭുതമായിരുന്നു രാഗം എന്ന് പിന്നീടെപ്പോഴോ എവിടെയോ വായിച്ചിരുന്നതായി ഓർമ്മയിലുണ്ട്.

ലൊക്കേഷനോ ? തൃശ്ശൂര് റൗണ്ടിൽ തന്നെ! ഹോട്ടൽ ഭാരത് പിന്നെ പത്തൻസ് തൊട്ടടുത്ത്!

ആദ്യ സിനിമ നെല്ല്, ഞാൻ രണ്ടാമത്തെ സിനിമ ആണ് കണ്ടു തുടങ്ങിയത്, ബെൻഹർ! ചാൾട്ടൺ ഹേയ്സ്റ്റൻ! അതിലെ ഫേയ്മസ്‌, ചാരിയട്ട് റേസ് ! തീയേറ്റർ കുലുങ്ങി, പ്രേക്ഷകർ കിടുങ്ങി അത്രക്കു ഗംഭീരം ആയിരുന്നു വിഷ്വെൽസും സൗണ്ടും!  പിന്നെ എത്ര എത്ര സിനിമകൾ! ഓർമ്മയിൽ നിന്നും മായാതെ നിൽക്കുന്ന ക്ലോസ് എൻകൗണ്ടെർസ് ഓഫ് ദി തേർഡ് കൈൻറ് (റിച്ചാർഡ് ഡ്രെഫ്യൂസ്),  ദി മിഷൻ (റോബർട്ട് ഡി നീറോ), പിന്നെ ഇമ്മടെ ഷോലെ (ക്ലൈമാക്സ് സീനിൽ ബച്ചൻ ഹെഡ് ഓർ ഹെഡ് കോയിൻ ടോസ് ചെയ്യുന്നത്), മൈ ഡിയർ കുട്ടിച്ചാത്തൻ, ത്രീ ഡി(അതിലെ ഒരു സീനിൽ, നിലത്തു വീഴുന്ന സ്വർണ നാണയം സീറ്റുകൾക്കിടയിൽ വീണ പോലെ തോന്നിപ്പിച്ച ശബ്ദം!) അങ്ങിനെ പലതും..അടിപൊളി സിനിമകൾ!

ബാലചന്ദ്രമേനോന്റെ ‘ഉത്രാടരാത്രി’ ഓർമ്മയിലുണ്ട്! അന്നാണ് പ്രീ ഡിഗ്രി യുടെ ഫസ്റ്റ് ഇയർ റിസൾട്ട് വന്നത്! കോളേജിൽ പോയി നോക്കിയപ്പോൾ റിസൾട്ട് വന്നിട്ടുണ്ടായിരുന്നില്ല! അപ്പൊ അടുത്ത രണ്ടു മൂന്നു  സുഹൃത്തുക്കളും ഒത്തു തൃശ്ശൂര് പോയി രാഗത്തിൽ സിനിമയ്ക്കു കയറി! സിനിമ കഴിഞ്ഞു എലൈറ്റിൽ നിന്നും ഒരു നൈറോയ്സ്റ്റും കാപ്പിയും കഴിച്ചു വീട്ടിൽ എത്തിയപ്പോ നേരം വൈകി. വീട്ടുകാരും അടുത്ത വീട്ടിലെ ആൾക്കാരും പുറത്തുണ്ടായിരുന്നു! എന്റെ റിസൾട്ട് അവർ അറിഞ്ഞിരുന്നു. ഒരു വിഷയം പോയിരിക്കുന്നു! നല്ലോണം പഠിക്കുന്ന കുട്ടിയായതുകൊണ്ടു (അത് നാട്ടുകാരുടെ അഭിപ്രായം!) വിഷമിച്ചു നാട് വിട്ടോന്നു അവർക്കു തോന്നീത്രെ! എനിക്ക് നല്ല പെട (അടി) കിട്ടി! വീട് വരെ എന്റെകൂടെ കൂട്ടിനു വന്ന സുഹൃത്തിനുഅടക്കം ചീത്തയും!

സപ്പ്ളി എഴുതിഎടുക്കാവുന്നതേ ഉള്ളു! ഇപ്പൊ ആലോചിക്കുമ്പോൾ ചിരി വരുന്നു 😁

വിഷയം മാറി! തിരിച്ചു വരാം! അപ്പൊ എന്താണ് പറഞ്ഞു വന്നത്? ആ..

ഏകദേശം രാഗം പോലെ ഉള്ള വേറെ ഒരു തിയേറ്റർ ഉള്ളത് ചാലക്കുടിയിലെ സുരഭി ആണ്. അത് പിന്നീട് ഡിഗ്രിക്ക് പഠിക്കുമ്പോൾ ആയിരുന്നു കണ്ടത്.  പക്ഷെ രാഗം പോലെ രാഗം മാത്രമേ  ഉള്ളു, അന്നും ഇന്നും!

എത്രയോ വര്ഷങ്ങള്ക്കു ശേഷം ഇന്ന് വീണ്ടും രാഗത്തിൽ! ആ ഫീലിംഗ് പറഞ്ഞാൽ മനസ്സിലാകില്ല! ഇന്നിപ്പോ സൗണ്ട്, ഡോൾബി അറ്റ് മോസ് ! തിരശശീല ഉയരുമ്പോൾ മ്യൂസിക് ‘മാൻ മെഷീൻ’! പണ്ടും അത് കേട്ടിട്ടുണ്ട്!

പടം കമൽ ഹാസ്സൻറെ ‘തഗ് ലൈഫ്’! എനിക്ക് ഇഷ്ടപ്പെട്ടു! ആരൊക്കെ എന്ത് പറഞ്ഞാലും. കഥയ്ക്ക് പുതുമ ഒന്നും  ഇല്ല, പക്ഷെ  മണി രത്‌നം ഇപ്പോഴും മൂപ്പരുടെ ടച്ച് വിട്ടിട്ടില്ല! എല്ലാരും നന്നായി അഭിനയിച്ചിട്ടും ഉണ്ട്! ദളപതി, നായകൻ,,,, ഉലകനായകൻ ഇതിലും കസറി, കലക്കി!

ഇന്റെർവെൽനു അളിയൻ കൗണ്ടറിൽ പോയി കായബജി വാങ്ങി വന്നു. വലുപ്പം ഉണ്ടെങ്കിലും രുചി പോരാ! പണ്ട് ഗിരിജ തിയേറ്ററില് കിട്ടുമായിരുന്ന ബജി ആണ് ബജി ! (ചെറുപ്പത്തിൽ, ഞാറാഴ്ചകളിൽ,പുത്തൻ പള്ളിയിൽ കുർബാന കഴിഞ്ഞു ജോസേട്ടൻ സൈക്കിളിൽ ഗിരിജയിൽ സിനിമക്ക് കൊണ്ടുപോകുമായിരുന്നു, അന്നത്തെ ബജിയുടെ രുചി ഇപ്പോഴും നാവിലുണ്ട്! നല്ല ചൂട് ബജി!)

നല്ല ഒരു അനുഭവം ! അടുത്ത കൊല്ലം തൃശ്ശൂർക്ക് വര്യല്ലേ! ഇനിയും കാണാലോ! സിനിമ കഴിഞ്ഞു. തല്ക്കാലം വീട്ടിൽ പോട്ടെ.

തിരിച്ചു വീട്ടിലെത്തിയിട്ടും കമൽ മനസ്സിൽ നിറഞ്ഞു നിന്നിരുന്നു… രാഗവും!

പണ്ട് സപ്ന തീയേറ്ററിന്റെ അടുത്ത്, തൃശ്ശൂര് റൗണ്ടിൽ തന്നെ ഉണ്ടായിരുന്ന ചെറിയ ഒരു ഹോട്ടൽ!

മോഡൽ സ്കൂളിൽ പഠിക്കണ കാലത്തു പാറമേക്കാവിന്റെ അടുത്തുണ്ടായിരുന്ന ഹോട്ടൽ ത്രിവേണി ആയിരുന്നു എന്റെ ഫേവറേറ്റ് ! അവിടത്തെ മസാലദോശയുടെ മണം ഉള്ളംകൈയിൽ ഇന്നും ഉണ്ട് ! അത് പിന്നീട് കല്യാൺ എടുത്തു സ്വർണ്ണപ്പീടിക ആക്കിയപ്പോൾ തോന്നിയ ദേഷ്യം ഇപ്പോഴും ഉണ്ട് !

എന്റെ പേരിൽ ഉള്ളതായകരണമല്ലാട്ടാ, (വീട്ടിൽ എന്റെ വിളിപ്പേര്, മണി, സ്നേഹത്തോടെ മണിമോൻ!) മണീസിലും മസാല നല്ലതായിരുന്നു, വലുപ്പം കൂടുതലും! വല്ലപ്പോഴും അവിടെയും പോയിത്തുടങ്ങിയിരുന്നു! പിന്നെ പിന്നെ അക്ക്വയർഡ് ടേസ്റ്റ് ആയി! പിന്നീടെപ്പോഴോ ആ കടയും പൂട്ടിപ്പോയതറിഞ്ഞു ! ആലുക്കാസിനോടും തോന്നി ദേഷ്യം! മണീസ് മാത്രമല്ല സപ്നയും പൂട്ടിച്ചില്ലേ!

കഴിഞ്ഞ തവണ തൃശ്ശൂര് വന്നപ്പോൾ അറിഞ്ഞു, മണീസ് കഫെ ഉയർത്തെണീറ്റു എന്ന്! കിട്ടിയ താപ്പിന് ഇത്തവണ പോയി, പഴമയുടെ പ്രൗഡിയിലിതാ, മണീസ് കഫെ !!

ഗിരിജാ തീയേറ്ററിന് അടുത്താണ്. ചേറൂർ സൈഡ്. സ്ഥലം പെരിങ്ങാവ് എന്ന് പറയും.

ചെന്ന ഉടനെ മസാല തന്നെ ഓർഡർ ചെയ്‌തു.

ആ രുചിയും മണവും ആസ്വദിച്ചു കഴിച്ചു. ഒരു കാപ്പിയും. “സന്തോഷായീ ഗോപ്യേട്ടാ”! 🤓

മൂന്നു ദിവസം മുൻപ് കഴിച്ച മസാലയുടെ രുചിയോർത്തു മണീസിൽ ഇന്നും പോയി! സൺ‌ഡേ മുടക്കമാണെന്നറിഞ്ഞില്ല!

ഡെസ്പ് ആയി തിരിഞ്ഞു പോരുമ്പോൾ അതാ ഒരു മണീസ്! അപരന്റെ പേര് മണീസ് ഹോട്ടൽ!

കേറി കഴിച്ചു, മസാല കുഴപ്പമില്ല.

Note: മണീസിലെ മസാല ദോശ 👆 ഇതിലും ഗംഭീരം ആണ്‌ട്ടാ. ആവേശം കാരണം ഫോട്ടോ എടുക്കാൻ മറന്നിരുന്നു. ഇനിയുംഎടുക്കാലോ!

അടുത്തകൊല്ലം തൃശ്ശൂർക്ക് വര്യല്ലേ! അപ്പൊ മണീസ് വീണ്ടും, വീണ്ടും, മുടക്കമില്ലാതെ!

കൂടാതെ വടക്കാഞ്ചേരി മദ്രാസ് ഹോട്ടൽ 👍, ഒല്ലൂര് ഹോട്ടൽ ശ്രീഭവൻ 👍, ഒല്ലൂര് അടുത്ത് തന്നെ ഉള്ള ഹോട്ടൽ മഹേശ്വരി 👍,തൃശ്ശൂർ റൗണ്ടിലെ ഭാരത്, പത്തൻസ് , ആമ്പക്കാടനടുത്തുള്ള ന്യൂ ഗോപി, പിന്നെ പഴയ മുൻസിപ്പൽ സ്റ്റാൻഡിലെ രാധാകൃഷ്ണ, എല്ലാം സൂപ്പറാ!👍

എങ്കിലും ത്രിവേണിയിലെ മസാല ദോശയുടെ രുചിയും മണവും വേറിട്ട് നിൽക്കുന്നു! ഇപ്പോഴും എനിക്ക് മറക്കാൻ കഴിയില്ല. അവിടത്തെ മസാല ദോശ ചെറുതും ആയിരുന്നു. അതുകൊണ്ടു ഇടക്ക് ഞാൻ ഒരു ദിവസം ലഞ്ച് സ്കിപ് ചെയ്തു (സ്‌കൂളിൽ പോകുമ്പോൾ ദിവസേന ലഞ്ച് മണി കിട്ടുക അഞ്ചു രൂപ ആയിരുന്നു. അതിൽ 50 പൈസ ബസ് ചാർജ് ആയി പോകും, വടക്കാഞ്ചേരി ടു തൃശ്ശൂർ ആൻഡ് ബാക് ടു വടക്കാഞ്ചേരി, എസ് റ്റി ടിക്കറ്റ് ഫോർ സ്റ്റുഡന്റസ്! ബാക്കി നാലര രൂപക്ക് മസാല ദോശ ആൻഡ് കാപ്പി!) പിറ്റേ ദിവസം രണ്ടെണ്ണം കഴിക്കുമായിരുന്നു. അത്രയ്ക്ക് കൊതിയായിരുന്നു അവിടത്തെ മസാല ദോശയോട്!

ഇനിയും എക്‌സ്‌പ്ലോർ ചെയ്യാനുണ്ട്, ധാരാളം പുതിയ ഹോട്ടലുകൾ വന്നുകൊണ്ടേയിരിക്കുന്നു!

ഹോട്ടൽ മഹേശ്വരി ☝️

തൃശ്ശൂർ ഡിസ്‌ട്രിക്ടിലെ മിക്ക നല്ല ഹോട്ടലിലെയും മസാല ദോശകളുടെ ഒരു താരതമ്യ പഠന റിപ്പോർട്ട് തയ്യാറാക്കുന്നുണ്ട്. അത് പിന്നെ ഒരു ലിവിങ് റിപ്പോർട്ട് ആയിരിക്കുമല്ലോ കാരണം പീരിയോഡിക്കലി ക്വാളിറ്റി മാറാലൊ! ഒരു പെരിയോഡിക്കൽ ചെക്ക് ആവശ്യമായി വരും! ഹോട്ടലുകാരുമായി കൊളാബോറേറ്റ് ചെയ്യാൻ പറ്റുമോ എന്ന് നോക്കണം! റാങ്ക്/റേറ്റിംഗ് കൊടുക്കുന്ന, എ ടേസ്റ്റ് ചെക്കർ കം ഇവാലുവേറ്റർ, എക്സ്ക്ലൂസീവിലി ഫോർ മസാല ദോശ! ഈ പ്രൊപ്പോസൽ ഐഡിയ എപ്പടി?!😄

btw. ഈ പോസ്റ്റ് പുതിയതൊന്നും അല്ല, ഉദാഹരണം, ഫുഡ് ക്രിട്ടിക് ഇൻ Ratatouille മൂവി! 🐁👩‍🍳👌

മസാല ദോശ മാറി മാറി തിന്നു ഞാൻ നിർവൃതി അടയും! 😋🥰
ഈശ്വരാ, കാത്തോളണേ..🙏🏻